Gaur egun jende asko dago zinemara joatea gustuko duena, eta geroz eta gehiagok gustuko dute ez bakarrik ikuskizunen sailean azaltzen diren filmak ikustea; baita ezagunak ez direnak ere, laburmetraiak, dokumentalak… Halakoak gustatzen zaizkienei proposamen bat zabaldu nahi diet.

Halloween eguna gerturatzen doan heinean, utero bezala, aurten ere Fantasiazko eta Beldurrezko Zinemaldiaren XVI. astea ospatuko da Donostiako Principe antzokian, Kursaalean eta Antzoki Zaharrean. Izua pantailetara urriaren 29an iritsiko da Paco Plazaren ‘Cuento de Navidad’ filmarekin eta azaroaren 5a bitartean iraungo du.

Aurtengo saioan, inoiz baino pelikula gehiago izango dira ikusgai. 18 film luzek hartuko dute parte lehiaketa nagusian, 6000€ irabazteko aukeraz.

Pelikula batzuk azpimarratuz, Plan de Vuelo: Desparecida, Robert Schwentkerena, Jodie Foster protagonistatzat duena eta El imperio de los lobos, Crish Naonena, Jean Reno pertsonaia nagusi duena. Bi hauek lehiaketaz kanpo egongo dira. Baita ere, El exorcismo de Emily Rose, Scott Derricksonena, eta Rob Zombieren Los renegados del diablo eta La casa de los mil cadáveresen bigarren zatia ikusi ahal izango dira. Laburmetraiak aipatuz, 15 izango dira.

Haurrak ez dituzte alde batera utzi, eta hauentzako egokiak diren emanaldiak ere izango dira; Olentzero eta Sublimaren Lapurreta eta El Guerrero Sin Nombre. Film zaharren maitale direnentzat, klasiko batzuk berrikusteko aukera ere izango da: La Humanidad en Peligro (1954) eta Planeta Pohibido (1956) .

Zinemaz kanpo ere jarduerak egiten dira, erakusketa eta antzerkiz osatuak. Lehenengoak, Arthur Suydam komiki egilearen bilduma bat eta Pedro Usabiagak komikiei buruz ateratako argazkiak izango dira, besteak beste. Antzezlanak, berriz, filmak bezala, beldurrezkoak izango dira. Naphtaline taldeak Zoo, la Légende du roi singe antzeztuko du urriaren 29an Boulevardean. Honetaz gain, Corsario taldeak Vampyria emanaldia eskainiko du azaroaren 1ean Principe Antzokian eta Divertia taldeak Saurus Kursaalean azaroaren 5ean.

Ordutegiari begirada bat emateko, klikatu hemen

Lehengo batean lagunekin kalean nengoela eztabaida txiki bat izan genuen: hondartza ala mendia? Egia da, betidanik kostaldeko herri edo hiriak askoz ere turista gehiago izan dituztela; baina, hala ere, hau guztia aldatzen ari da, azkenaldian, nekazal turismoa geroz eta gehiago garatzen ari baita.

Euskal Herrira datozen turistek gure kultura, ohitura, gatronomia… ezagutzeko eskaintza handia dute. Euskadi, atsegin handiz web orriak dioenez:

Euskadi kontrastez beteriko lurralde bat da: industria asko eta populazio kopuru handia, baina baita oso berdea eta birjinala ere. Bi parajeak kilometro eskasotara daude kokaturik, eta beraz natura guneak eta ekosistemak aurkitu daitezke bere jatorrizko egoeran hiri handietatik oso hurbil. Parke eta erreserba hauen garrantziak eta edertasunak aukera asko sortzen dituzte txangolarientzat, kirol ezberdinak praktikatzeko eta atseden bat hartzeko.

Gainera, era guztietako erakundeak aurki ditzakegu: kultura aldetik hainbat museo ( Artium Gasteizen, Guggenheim Bilbon, Txillida Leku Hernanin, etab.); gastronomiari dagokionez, ostalaritza eskola ugari ( hain ezagun den Karlos Argiñanoren Zarautzen kokaturiko Aiala sukaldaritza eskola, esate baterako); hezkuntzari dagokionez, beste hainbat erakunde eta unibertsitate ( Ikastolen Elkartea , EHU, Deustuko Unibertsitatea , Mondragon Unibertsitatea …), aisialdiari begira hipodromoak, kasinoak ( Kurtsaaleko Kasinoa Donostian eta Nerbioi Kasino Handia Bilbon), parke ekologikoak eta, etxeko gaztetxoenentzat (eta ez hain gaztetxoentzat ere), jolas-parkeak.

Monumentuak ere ugariak dira. Nahikoa da edozein herritara joatea eta bertako udaletxe nahiz eliza edota kale zahar estuak beneratzea, gure buruko kezka guzti-guztiak uxatzeko. Eta ez hori bakarrik, aipatu beharra dago Santiagoko bideak Euskal Herria ekialdetik mendebalderantz igarotzen duela, beraz, aterpetxe eta ospitale dexente ere badaudela.

Baina hasierako harira bueltatuz, kostaldeko turismoak Bizkaia eta Gipuzkoako hondartzez gozatzeko aukera aparta ematen digu. Eta ez hori bakarrik, surfa, urpekaritza eta hainbat eta hainbat ur-kirol burutzeko aukera ere badugu. Nork deritzo hondartzari aspergarria?

Hala eta guztiz ere, lasaitasunaren bila bazoaz, argi eta garbi dago nekazal turismoa aukera aproposena duzula: turista dentsitate baxua, etxe edo baserri galduak, erabateko isiltasuna, ipuinetako baso eta errekak… Asteburu ahaztezin bat igarotzeko prest bazaude bisita itzazu Euskaraz.com orriak eskaintzen dituen informazio eta estekak.

Azkenik, hirietako turismoa daukagu, kanpotar gehienak erakartzen dituena. Hain ezagunak diren Bilboko (Marijaia), Donostiako eta Gasteizko (Zeledon) Aste Nagusiak eta, nola ez, Iruñeko San Ferminak turista ugari ekartzen dituzte Euskal Herrira.

Honek guztiak argi eta garbi uzten du Euskal Herrian giro aparta dagoela. Gainera, hirietan- ostalaritza arloari dagokionez- beste tokietan baino askoz ere eskaintza handiagoa dago, beraz, orokorrean beste kasuetan baino errazagoa izaten da azken orduko erreserba bat egitea.

Badakizu, lasaitasunaren bila bazoaz lagun, nekazal turismoa duzu aukerarik onena. Eguzki izpi batzuk nahiago badituzu, jo ezazu kostaldeko turismora. Baina, nire kasuan bezala, festa giro on baten bila bazabiltza, euskal hiriek aukera bikaina eskaintzen dute! Eta zuk zer deritzozu? Ezagutzen al duzu txoko erakargarririk? Hala bada, hementxe duzu horren berri emateko gunea…

Informazio guztiz interesgarria nahi izanez gero, joan EUSKADI, atsegin handiz web orrira, ez zara damutuko!

Hori da Berri Txarrak taldeak hilabete honen hasieran kaleratu zuen 5. diskaren izena. Lekunberrikoak uztailaren 10ean hasi ziren hau grabatzen etxetik gertu duten baserri batean, baina abestien nahasketak egiteko ozeanoa zeharkatu eta Kansasera joan ziren Black Lodge estudioetara. Nahasketak Coalesce, The Get Up Kids edota Kurt Cobain berarekin lan egin izanagatik ezaguna den Ed Rose ekoizleak egin zituen. Diskoaren produkzioarekin amaitzeko, hau da diskoa masterizatzeko, berriz, New Yorkera joan ziren, Turtletone estudioetara hain zuzen ere. Bertan, Mike Fossemkemper ibili zen masterizazio lanetan.

Emaitza, 12 abesti hauez osaturiko diskoa:

1. Zertarako amestu
2. Berba eta irudia
3. Oreka
4. Iparra galdu: Hegora joan
5. Jaio.Musika.Hil
6. Onak eta txarrak
7. Iraultza Txikien Asanblada
8. Bueltatzen
9. Kezkak
10. Isiltzen banaiz
11. Breyten
12. Gelaneuria

Disko berri honek dakarren aldaketarik nabarmenena orain taldean hiru besterik ez direla da. Taldeak aipatzen duen beste aldaketa bat letrei dagokiona da. Hirukoteak dioenez, disko honetako abestien letrak inoiz idatzi dituzten gogorrenak dira, eta, era berean, pertsonalenak ere bai. Musikari dagokionez, agian aurreko diskoak baino lasaiagoa da, baina oso melodia zainduak eta, beti ere, Berri Txarraken doinu karakteristikoez bustia. Aurretik noiz edo noiz gertatu bezala, kolaborazio bat izan dute disko honetan ere, Deabruak Teilatuetan taldearen abeslari zen Aritz Mendietak Iraultza Txikien Asanblada izeneko abestian parte hartzen du.

Jaio. Musika. Hil honen abestiak zuzenean entzuteko aukera euskaldunok izan dugu jada. Urrutira joan gabe aurreko ostiralean Ibarrako gaztetxean izan ziren, baina bertara gerturatu ez zirenek badute aukera laster Gasteizen, Bilbon edota Irurtzunen taldea ikusteko. Tarteka Euskal Herritik atera eta Espainiako hainbat tokitan ere izango dira, azaroan Estatu Batuetara abiatu arte. Bertan, 4 kontzertu eskainiko dituzte, horietako bat Betagarri taldearekin batera. Ondoren bueltatu eta kontzertuak eskaintzen jarraituko dute Espainian zehar.

Nire ustez, kontzertuak disko bat zein ona den egiaztatzeko leku aproposenak diren arren, aukera ez izanez gero, ezer baino hobe diskoa bera entzutea da, beraz, ez galdu denborarik eta eros ezazue, benetan merezi du eta!

Neuk bezala, automobilismoaz maitemindutako orok ezin dio luxuzko mendiko kotxeei begirik ere kendu. Elegantziaren eta indarkeriaren arteko harmonia perfektu dira, denaren gainetik ipintzeko boterea ematen dutenak, gizakiaren handinahiaren erreflexu zuzenak, alegia. Nahi duzuna egiteko askatasuna eskaintzen dizute, betiere ematen duten konfortarekin bidaiatzea esperientzia ahaztezin bilakatzen delarik.

Baina auto hauek badute trabarik, bakarra bada ere: garestiegiak suertatzen dira. Hala eta guztiz ere, auto guztien jabe eta zaindari diren hauen salmentak gorantz doaz, gizakion nahiak ahala gainditzen duelarik, ametsa edo fikzioa errealitate bilakatuz.

Fenomeno honen ondorio zuzen gisa, hau guztia izen handieneko etxeen kontua izatetik, aukera zabaldu eta, beste etxeen kontua ere izatera pasa da. Konpetentzia areagotu egin da, segmentu hauen aintzindari direnen kalterako, baina, aldi berean, gainontzeko ekoizleen, eta zeresanik ez erosleon onerako.

Orain arte, Europako SUVen (Sport Utility Vehicle) merkatuan, segmentu honetan murgildu ziren lehenak izan dira nagusi, besteak beste, BMW X5a eta Mercedes-benz ML autoa. Europan prestigio handien duten fabrikatzaileak dira, biak alemaniarrak, luxuzko merkatu zabalean jaun eta jabeak, lehena bere portaera dinamiko hobezinarengatik eta izaera deportiboarengatik gailentzen dena, eta bestea, berriz, bere konfort ukitu eta izpiritu elegantearengatik. Bi auto hauek izan duten arrakasta dela eta, behin eta berriro berritzen dituzte, mehatxu berrien aurrean zaharkituta geratu ez daitezen.

Aipatu beharra dago, hala ere, BMW dela nagusi. X5ak sekulako arrakasta du. Etxe honek ematen duen segurtasunaz gain, motore barietate itzela du, eta dieseletan, batez ere, eskaintzen duten potentzia eta duten tamaina eta pisua kontuan hartuz gero, oso kontsumo txikia dute. Dinamismoa aparta da beti, berlina batean zoazela dirudi, itzel mugitzen da, batez ere asfaltuan, eta mendian ere ez da atzean gelditzen. Gainera, diseinuari eta materialei dagokienez, bonboi hutsa izateaz gain, BMWk merkatu zabalena eskaintzen du, modelo merkeago bat baitu, X3a, eta 2008rako x6a aterako baitu.

Mercedesen MLa ordea, eleganteenentzat dago gordea. Modelo berriak gainera asko irabazi du, eta egungo X5a apur bat zaharkituta uzten du. MLaz gain, M izeneko modeloa ere eskaintzen digu.

Volvoren XC90a aipatu ez badut ere, aipatzekoa da. Horren arrakasta handia izan ez badu ere, etorkizunera begira izan lezakeela ezin da ukatu, Volvo etxearen bertutea segurtasuna baita, egungo erosketetan gero eta garrantzi handiagoa eskuratzen ari den faktorea alegia.

Land Rover etxea ere ezin dugu ahaztu. Orain arte berariaz mendian ibiltzeko autoekin lan egiten zuen, baina jabetu da erosleen eskaera bestelakoa dela, hau da, lur orotako ibilgailuak bai, baina asfaltuan konforta eskaintzen dutenak nahi ditugula, espazio eta indarraren konbinazio izaki. Horrela bada, Discovery3ak eta Range Roverrak metamorfosi handia jasan dute segmentu honetan borrokatzeko. Discvery3a gainontzekoak baino merkeagoa da, Range Roverra berriz, garestixeagoa. Gainera, lehen aipatutako etxeekiko abantaia garbia izango du Land Roverrek, erosleak jakin badakielakomendirako hoberik ez dagoela .

Gaur egun, ordea, luxuzko auto hauen merkatuan, beste etxe batzuk bere lekua hartzen ari dira pixkanaka.

Lehenik, Volkswagenen eskutik Touarega iritsi zen. Oso erantzun ona izan zuen erosleen aldetik, lehen aldia zela aintzat hartuz.

Ondoren, Porsche etxe ezagunak Cayannea atera zuen. Honen salmentak eskaxagoak dira, izan ere, garestiena baita. Honek, ordea, badu bere alde ona ere, lehen ikustaldian antzematen da bere etxearen izaera potenteari leiala dela.

Aipatuko dudan azken modeloa, Audi etxeak Frankfurteko auto erakusketan atera berri duen Q7a izango da. Sekulako oihartzuna izan du. Handiena izango da, zazpi eserleku izango dituelarik, eta diseinu aldetik, aparta zalantzarik gabe. Hau ere, seguraski, gerestiegi suertatuko da erosleen gehiengoarentzat.

Gero eta zabalagoa den aukera honekin, orain arte Alemanian finkatua zegoen tronua dantzan hasi da. Borrokaren txinpartek sua piztu dute, eta hil ala biziko lehia bilakatu da. Nor bihurtuko ote da segmentu berri honetako errege? BMW etxeak guztien gainetik nagusitzen jarraituko al du?
Edonola ere, irabazle irtetea ez dago batere merke. Mercedesen mehatxua beti egongo da hor, Land Roverren esperientziak pisu handia du, eta Volkswagen eta Audi etxeak hartzen ari diren indarrak ere kikildu egiten du. Volvo ere beti egon izan da lehian, Porshe beste segmentu askotan ere errege da, eta gainera, fabrikatzaile gehiago ere badaude, eta gehiago ere sartuko dira.

Nor suertatuko da garaile???

Azken aldian, Donostiako Zinemaldiaz geroztik, nork ez du entzun Aupa Etxebeste filmaren berri? Euskal Herrian ekoiztu den filme hau sekulako arrakasta lortzen ari da.

Pelikula hau bi zuzendari berrik egin dute, Asier Altuna eta Telmo Esnalek. Esan beharra dago, filma euskaraz egin dela eta hau pisuzko arrazoia izan daiteke berau ikustera joateko.

Gaur egun, denoi axola zaigu besteek gutaz duten iritzia. Etxebestetarrak itxuraz dirudunak direla ematen duen arren, hori ez dela egia ikusiko da filmean zehar. Kanpotik ikusten dena, agian, errealitatetik at egon daiteke.

Bestalde, filmean ageri diren gaiak nahiko konplexuak direnez, zuezendariek ironia pittin batekin azaldu nahi izan dituzte pasarteak. Baita lortu ere! Etxebeste familia urtero, udako oporretan, hilabeterako Marbellara joaten dira. Aurten, diru gabe daudenez , Patriciok (familiako aitak) etxean geratu behar direla esaten die beste senideei.

Baina konbentzituko al du Patriciok bere familia oporrak etxean pasatzeko? Gerta daitekeena ikusteko, Euskal Herriko zinema ugarietara joan besterik ez duzu. Zalantzarik ez dago sekulako algarak botako dituzula.. .Animatzen zaren bitartean, hementxe duzu ikusteko grina pizteko bideo bat.