Ordiziako gaztetxearen 20. urtemugarako marrazki polit eta proposamenen bila gabiltza

Ordiziako gaztetxeak 20 urte beteko ditu aurten eta, honen haritik, Ordiziako Gazte Asanbladak urtemuga berezi honetako marrazkia izango dena aukeratzeko lehiaketa jarri du abian.

Lehiaketan parte hartzeko, marrazkiak 20.urteurrenarekin zerikusi zuzena izatea beharrezkotzat jo dute antolatzaileek eta baita gaztetxearen logotipoa bertan azaltzea ere.

Bi arau nagusi hauez gain, irudimena ere baloratu eta eskertuko da marrazki txapelketa honetan. Lanak gaztetxean bertan jasoko dira, honetarako azken eguna otsailaren 28a izango delarik.

Gainera irabazleak jasoko duen saria ere ez da nolanahikoa izango, bi lagunentzako afari aparta jasoko baitu Ordiziako gaztetxearen eskutik, 120€ balio duen otordua, alegia.

Gazte Asanbladatik jende guztia gonbidatu dute animatu ete lehiaketan parte hartzera eta noski baita urtemugari begira antolatuko diren ekintzetan parte hartzera ere.

Beasaingo Udaleko Euskara-batzordeak, Gipuzkoa-Donostia Kutxak lagunduta, ikasleen euskaraz idazteko trebetasuna sustatzeko, BEASAIN idazlehiaketa sortu zuen 1990ean. Aurtengo hau, beraz, XVI. lehiaketa izan da. Urteak daramatzagu Jakintzakook idazlehiaketa honetan parte hartzen , baita sariak irabazten ere!

Euskaljakintzako kideok, behin eta berriz adierazi dugun bezala, euskal literaturaren alde apustu egin nahi dugu. Ikasturtean zehar hainbatetan aipatu dugun legez, euskal autoreak ezagutu nahi ditugu (klasikoak zein berri-berriak), eta beraiei buruz gehiago jakin nahi izateaz gain, dakiguna besteekin partekatu nahi dugu. Eta, horregatik, duela gutxi atal berri bat sortu genuen zeinetan guk hautatutako irakurgai eta idazleei buruzko iritzia ematen dugun hainbat liburu ezagutarazteko xedez. Atal berri honi Irakurlearen txokoa deitu diogu eta, esan behar, dagoeneko landatutako zuhaitzari adaxkak ateratzen hasi zaizkiola.

Irakurtzea, beraz, gure erronketako bat da, ez da bakarra baino! Besteen ekoizpenak irakurtzea ondo dago, baina guri ere idazteko grina piztu zaigunez, idatzi ere egin nahi dugu! Ausartak gara, aurreko artikuluak irakurtzen badituzue, edozein gairi buruz aritzen garela konturatuko zarete. Eta horrela jarraitu nahi dugu…

Baina zertara dator hau guztia? Bada, duela egun batzuk jakin genuen aurtengo edizioan ere sarituak suertatu garela! Gure idazlanek aurten ere ikastolako paretako hormak gainditu dituzte, eta Beasaingo epaimahaikoen gustukoak izan dira.

Aipamen berezia gure Xabiri (euskaljakintzan Xarana bezala ezagutua). Bai, hori, artikulu luze bezain interesgarri horiek idazten dituena, euskara eta matematikako jokoak uztartzeari ekin ziona… Iaz,A mailan (maila gorenean) bi 1go sari jaso zituen, hitz-lauz edo prosan eta poesian eta aurten ere bai!!! Hau ez dut uste sariketaren historian zehar inoiz gertatu denik!! Zorionik beroenak! Baita Esther, Eneritz, Eñaut eta Garazirentzat ere! Goiko argazkian bostak ikus ditzakezue gaurko ekitaldiaren amaieran.

Lortutako sariak ondorengoak dira:

A mailan (1988 eta 1989 urteetan jaiotako eskualdeko ikasleen artean)

HITZ LAUZ

1. SARIA: (210 € eta oroigarria)
Idazlana: ALBERTO
Egilea: Uko. XABIER ARAÑA URTEAGA.

AIPAMEN SARIAK (55 €)
Idazlana: IRAGANEKO HORMA
Egilea: Sorgintxo. ENERITZ ZABALETA MERINO.

Idazlana: BESTALDERAKO BIDEA
Egilea: Baten bat. ESTHER ESKISABEL DE JUAN.

OLERKIAN

1. SARIA: (180 € eta oroigarria)
Olerkia: BAZINEN BEHIN
Egilea: Katixa. XABIER ARAÑA URTEAGA.

AIPAMEN SARIAK (45 €)
Olerkia: LORE BAT
Egilea: Sorgintxo. ENERITZ ZABALETA MERINO.

B mailan (1990 eta 1991 urteetan jaiotako eskualdeko ikasleen artean)

AIPAMEN SARIA (45 €)
Idazlana: AITONAREN AHOTSA
Egilea: Zurrapa. EÑAUT AGIRRE ITURRIOTZ.

D mailan (1992 eta 1993 urteetan jaiotako eskualdeko ikasleen artean)

1. SARIA: (150 € eta oroigarria)
Idazlana: OLENTZERO GEURE BARNEAN DA.
Egilea: Izana. GARAZI OTEGI ETXEZARRETA.

Idazlan saritu gehiago irakurri nahi badituzue, hementxe topa ditzakezue.

Ez nuke bukatu nahi aipatu gabe, gaurko sari banaketan, Xabier Mendiguren Elizegi idazlea ezagutzeko aukera izan dudala. Bera blogen mundu honetan aspaldidanik ari da eta guretzat erreferentzia ere izan da askotan! Garbi dago eta garbi gelditu da blogariok badugula lotzen gaituen alegiazko soka bat, kontu berdintsuak irakurtzeaz gain, izen berdinen inguruan mugitzen baikara. Hortxe egon gara beste blogari batzuk goraipatzen eta ederki solasean (esan behar pintxorik gabe gelditu naizela!!!). Poztu nau zu ezagutzeak, Xabier!

Aurreko igandean, goizeko saioaren ondoren, arratsaldekoaren erdian, azkenean, iritsi zen Barakaldon guztiok eta komunikabideetatik saioa jarraitzen zuten guztiak ere itxaroten ari ginen liparra; bi finalisten izenak esango zituzteneko unea. Lehenengoa, abedearen arabera, argi zegoen bertsolariaren izena ahoskatu zuen aurkezleak, Egaña hain zuzen ere. Hurrengoa, bigarren finalista, Iturriaga izan zen eta, egia esan, ez nuen espero bera izango zenik Andonirekin batera txapelaren bila joan zena. Ez espero ezta nahi ere! Beno, ez zitzaidan gehiegi axola, baina nire barnean zerbaitek esanen zidan Amets nahi nuela oholtza gainean ikusi.

Azkenean, Unai eta Andoni buruz buru ikusi izan genituen eta, nola ez, zaharrenak eskuratu zuen garaipena. Argi geratu zen, lau txapelketa irabazi ostean, bertsolarien errege dela. Hasierako agurrean ere ohartarazi zigun ez zela tablatura igoko jolastera, irabaztera baizik.

Hirugarren, txapelketako neska bakarra, Maialen Lujanbio, izan zen, eta, egia esan, nire uste apalean, nahiko bertso tristeak bota zituen. Laugarren, Maialeni bizkarra zapalduz, Amets Arzallus geratu zen.

Hau guztia gazte euskaldunak nabarmendu ginen ingurunean gertatu zen, betiko Barakaldo atzean utzirik. Eta gazte euskaldunak izan ginela diot, Egañak bere azken bertsoetako batean honako hau aipatu zuelako: euskaldun izateko lehenengo baldintza euskaraz mintzatzea da.

Txapelketari buruzko informazio gehiago nahi baduzue:

Goierriko hitzan

Bertsolari txapelketako webgunean

Bortz final-laurden eta sei finalaurrekoren ostean, igande honetan, hilak 18, final nagusia izango da BECeko Bizkaia Arena aretoan, 11:00etan hasita.

Txapelketa hau lehen aldiz 1935.urtean antolatu zuten, Iñaki Eizmendi “Basarri” bertsolari errezildarra garaile izan zelarik. Baina azken urte hauetan, 1993, 1997 eta 2001 urteetan, Andoni Egañak soilik izan du txapela janzteko aukera. Igande honetan bera ere Bilbon izango dugu Unai Iturriaga, Sustrai Colina, Jon Maia, Mailen Lujanbio eta beste zenbait bertsolarirekin lehian.

Irabazlea nor izango den, besteak beste, Josu Goikoetxea, Asier Ibaibarriaga, Alaitz Rekondo eta Saroi Jauregik erabakiko dute. Denera 8 aditu dira epaimahai hau osatzen dutenak.

Amaitzeko, antolatzaileak interesatu guztiei eskainitako informazioa luzatuko dizuet:

Txartel-motak eta prezioak

Txartel arrunta: sarrera (bazkideentzat 18 €, arrunta 25 €, haurrentzat 6 €)
Txartel ibiltzaria: sarrera + autobusa (+12 €)
Txartel tripazalea: sarrera + bazkaria (+18 €)
Txartel osoa: sarrera + autobusa + bazkaria

Eskuratu txartelak:

Herrietako salmenta puntuak

Zerbitzuak

•Haurtzaindegia: haurrak (3-10 urte bitartekoak) haurtzaindegian utzi nahi badituzu, jakinazari 943 217798 telefonora deituta edo administrazioa@bertsozale.com helbidera mezua bidalita.

•Bazkaria: 18 €ko menuan babarrunak, solomoa, azkenburukoa, ardoa eta ura sartzen dira. Bazkaria etxetik eramango dutenentzat mahaiak egongo dira. Bazkaltzeko pabiloian taberna egongo da.

Nola joan BECera

•Autobusean: Eskuratu txartelak
•Autoan: A-8tik datozenak Txorierriko pasabidetik joatea da onena, ez Malmasinetik. Horretarako, 19. irteeran atera (Getxo-Aireportua) eta hortxe hartu txorierriko korridorea, BECera zuzenean heltzeko.
•Aparkatzeko lekua badago inguruan dauden saltoki erraldoietako parkinetan. BECeko aparkalekua ordaindu egin behar da, besteak doakoak dira.

Autobusak:

Araba 1: 8:55 Gasteiz (Iparralde gizarte-etxea)
Gipuzkoa 1: 7:55 Irun (S. Juan Plaza, Bisera), 8:10 Oiartzun (Elizaren goikaldea), 8:25 Errenteria (Diputazio plazako geltokia)
Gipuzkoa 2: 8:15 Orio (Aita Lertxundiko geltokia), 8:25 Zarautz (Gurutze Gorriko geltokia), 8:35 Zumaia (Turismo bulegoaren aurrean)
Gipuzkoa 3: 8:10 Tolosa (San Frantzisko eliza), 8:25 Andoain (Azoka gunea)
Gipuzkoa 4: 8:40 Azpeitia (Etxe Zuri), 8:45 Azkoitia (Julio Urkijo kalea), 9:10 Elgoibar (Markinako bidegurutzea)
Gipuzkoa 5: 8:15 Ordizia (Tren geltokia), 8:25 Beasain (Tren geltokia), 8:40 Zumarraga-Urretxu (Pesako geltokia), 9:05 Bergara (Autobus geltokia)
Gipuzkoa 6: 8:35 Oñati (Correos atzean), 8:45 Arrasate (Garibay geltokia), 9:05 Eibar (Ardantzako geltokia)
Gipuzkoa 7: 8:10 Hernani (Atsegindegi), 8:25 Lasarte (Euskotreneko geltokia), 8:30 Urbil merkalgunea(Gasolindegiko geltokia)
Iparraldea 1: 7:25 Donibane Garazi (Merkatua), 7:55 Baiona (Leroy Merlin parkina), 8:25 Hendaia (Biriatuko peagea)
Nafarroa 1: 8:15 Iruña (Martzelo Zelaieta-Matesa), 8:25 Irurtzun (Autobus geltokia), 8:40 Etxarri Aranaz (Autobus geltokia), 8:55 Altsasu (Autobus geltokia)
Nafarroa 2: 8:25 Lekunberri (Plaza), 8:40 Leitza (Plaza)
Nafarroa 3: 8:10 Elizondo (Plaza), 8:25 Doneztebe (Herri sarrera), 8:40 Lesaka (Plaza)

Kamisetak

•Bazkideak 15 €
•Arruntak 18 €
•Finalaurrekoetan eta finalean eros daitezke.

Bertsolariek egin beharreko lana. Finala

Goiza

•Binaka, gai baten inguruan, 8ko Handian, 3na bertso.
•Binaka, gaia emanda, 8ko Txikian, 4na bertso.
•Bakarka, lehen puntua emanda, 2 bertso 8ko Txikian.
•Binaka, gaia emanda, 10ko Txikian, 3na bertso.
•Kartzelako lana: bakarka, gaia emanda, 3 bertso nahi den doinu eta neurrian.

Arratsaldea

•Binaka, gaia emanda, Aizak hi mutil mainontzi doinuaren neurrian 3na bertso.
•Binaka, Puntutan gaia emanda, 8ko txikian 8 bertso osatu arte.
•Bakarka, gaia emanda, 3na bertso nahi den doinu eta neurrian.
Azken bien lana
•Binaka, gaia emanda, 8ko Txikian 3na bertso.
•Binaka, gaia emanda, 10eko Handian 3na bertso.
•Kartzelako lana:
oBakarka, hitza gaitzat emanda, 9ko txikian bertso bat.
oBakarka, gaia emanda, 3 bertso nahi den doinu eta neurrian.

Ezaguna da gure artean Jardun Euskara Elkartearen AMODIOZKO GUTUNEN LEHIAKETA; izan ere, 1993. urtean lehengo aldiz antolatu zutenetik, gertutik jarraitu baitugu. Urtez urte sendotzen ari den amodiozko lehiaketa honen hurbileko jarraitzaileak garen neurrian, ondorengo lerroetan azken edizioaren oinarrien berri eman nahi dugu ea parte hartzera animatzen garen!!

Historia pixka bat eginez, aipatu beharra dago 1993ko lehenengo edizio hark izandako arrakastak bultzatu zuela elkartea lehiaketarekin jarraitzera. Harrez geroztik pasa dira urte dezente eta denbora honetan orduan hasitako bidea sendotzen eta finkatzen jardun dute.

Lehiaketaren ezaugarri eta berezitasunak

Aitzindaria. Euskal Herriko lehenengoa eta garrantzitsuena.
Munduan zehar badaude beste zenbait antzeko lehiaketa, arrakasta ikaragarria dutenak, hala nola, Veronan, Murtzian, eta Madrilen, baina Euskal Herrian maitasun gutunen lehiaketetan aitzindari Berrigara Amodiozko gutunen lehiaketa izan da.
Euskal Herri osora zabaltzen da eta oihartzun handia du.
Urteetan izan du partaidetza zabala, (urtero 100 gutun baino gehiago), epaimahaikide lanetan beti aritu da jende ezaguna (abeslariak, bertsolariak, idazleak eta abar) komunikabideek beti eskaini izan diote lehiaketari tarte zabala.

Helburuak:

Idatzizko hizkuntza-ezagutza bultzatzea
Kultur ekintza euskaldunak bultzatzea
Euskararen erabilera sendotzea
Kultur jarduera erakargarriak euskaraz eskaintzea Bergarako euskal giroa suspertzea

Beraz, jarraian aurki dezakegu Jardun elkartearen Amodiozko Gutunen XIV. Berrigara Lehiaketan parte hartzeko beharrekoa den informazioa guztia:

1- Lehiaketa honetan 1991ean edo lehenago jaiotako edozein pertsonak parte har dezake.
2- Lan guztiak jatorrizkoak, argitaragabeak eta euskaraz idatziak izan beharko dute.
3- Lanek gutun forma izan beharko dute eta DIN A-4 orritan eskuz zein ordenagailuz idatzita aurkeztu ahal izango dira. Lanen luzera ezin izango da bi orrialde baino gehiagokoa izan eta posta elektronikoz bidali ahal izango dira.
4- Lanean ez da egilearen daturik jarriko, lema bat bakarrik. Egilearen datuak (izen abizenak, adina, telefonoa, helbidea eta lanaren lema) kartazal itxi batean sartuko dira eta kartazal horren azalean lanean jarri den lema bera jarriko da. Posta elektronikoz bidalitako gutunen kasuan, gutuna fitxategi batean bidaliko da, “gutuna” izenarekin eta egilearen datuak, “egilea” izena duen beste fitxategi batean.
5- Lanak (originala eta hiru kopia) eta egilearen datuak dituen kartazala, handiagoa izango den beste batetara sartuta, honako helbide honetara bidali beharko dira:
Amodiozko Gutunen XIV. Berrigara Lehiaketa
Jardun Elkartea, Errotalde jauregia z/g
20570 Bergara
posta elektronikoa: kulturajardun@topagunea.com
web orrialdea: www.jardun.net
Lanak jasotzeko azken eguna 2005.eko urtarrilaren 5a izango da.
6- Sariak honako hauek izango dira:
• 1. saria: 450 euro
• 2. saria: 240 euro
• Bergarar onenarendako saria: 150 euro (1go edo 2. saria Bergarako norbaitek lortuko balu, bergarar onenarentzako saria hurrengo bergarar onenari emango litzaioke).
• 26 urte berakoen artetik onenari saria: 100 euro. Irakurle gazteek emandako saria (1go edo 2. saria 26 urtetik beherako norbaitek lortuko balu saria hurrengo gazte onenari emango litzaioke).
7- Sari ematea otsailaren 14an, San Balentin egunean egingo da, kultur etxean, arratsaldeko 19:00etan.
8- Lan guztiak Jardun Elkartearen esku geratuko dira eta osorik zein zatika argitaratzeko aukera izango du, beti ere, egilea zein den garbi adieraziz.
9- Lehiaketaren epaimahaia literatura eta kultura munduko pertsona ezagunek osatuko dute. Irakurle gazteen sarirako epaimahaia berriz, Bergarako Ertainetako ikastetxeetako ikaslez osatua egongo da.

Honekin batera, beste lehiaketa interesgarri honen berri ere eman nahi dizuegu:

SMS BIDEZKO IV. MAITASUN MEZUEN LEHIAKETA

1- Pertsona bakoitzak ezingo du mezu bat baino gehiago bidali.
2- Mezuaren ostean telefono mugikorraren zenbakia eta adina jarri beharko da.
3- Mezuak jasotzeko epea mugatua izango da; urtarriletik 1etik 15era.
4- Mezuak jatorrizkoak eta euskaraz izan beharko dute.
5- Mezuak 605712469 telefonora edo kulturajardun@topagunea.com posta elektronikora bidali beharko dira.
6- Irakurle Gazteek emango duten saria izango da: 90 euro.
7- Mezu guztiak Jardun Elkartearen esku geldituko dira.

(Nire ikasleei bereziki zuzendutako mezua) Ea azterketak bukatzen dituzuenean, parte hartzera animatzen zareten!!!!